نعت

مولانا منظور احمد آفاقی
وہ بوئے محمد پریشاں پریشاں وہ روئے محمد درخشاں درخشاں
دہانِ محمد دُر افشاں دُر افشاں زبانِ محمد زر افشاں زر افشاں
خدا خود ہے ان کا نگہبان و رہبر عزازیل ان سے گریزاں گریزاں
وہ خم دار گیسو معطر معطر وہ چہرہ کتابی فروزاں فروزاں
وہ راہیں ہیں ان کی منور منور وہ نقشِ قدم ہیں چراغاں چراغاں
کلامِ محمد ہے رہبر جہاں کا جہانِ محمد شبستاں شبستاں
وہ تلقین ان کی کہین و مہین کو وہ تعلیم ان کی دبستاں دبستاں
وہ رستہ بنا واہ کیا رشکِ جنت چلے جس پہ حضرت خراماں خراماں
لپیٹے انھوں نے خزاؤں کے بستر ہوئی ہر طرف پھر بہاراں بہاراں
محمد کا چرچا علیٰ رغمِ دشمن ہمیشہ رہے گا خیاباں خیاباں
مٹے نامیوں کے جہاں نام اکثر وہاں ان کے ساتھی نمایاں نمایاں
وہ دامن حضور آپ کا جس نے چھوڑا بھٹکتا پھرے گا بیاباں بیاباں
وہ منہ پھٹ ، وہ گستاخ دنیا جہاں کے سبھی ہوں گے اک دن پشیماں پشیماں
زمان و زمیں پر ، مکان و مکیں پر رہے ان کی رحمت فراواں فراواں