منقبت سیدۃ النساء حضرت فاطمۃ الزہراء رضی اﷲ عنہا

نادر صدیقی

دل پہ ہوتا ہے الہام نامِ بتولؓ                       پیارے ناموں میں اک نام نامِ بتولؓ
ہے وظیفہ سحر شام نامِ بتولؓ                              آگیا ہے مرے کام نامِ بتولؓ

آبروئے نبیؐ سیدہ فاطمہؓ                            مشک و بوئے نبیؐ سیدہ فاطمہؓ
عکسِ خوئے نبیؐ سیدہ فاطمہؓ                                یعنی روئے نبیؐ سیدہ فاطمہؓ

اہلِ بیتِ وفا دخترِ مصطفیؐ                                جانِ خیر الوریٰؐ دخترِ مصطفیؐ
آیتِ مصطفیؐ دخترِ مصطفی                                زوجۂ مرتضیٰؓ دخترِ مصطفیؐ

فاطمہؓ ہر طرح سے مبارک بنی                                  فاطمہؓ سچے لوگوں کا مسلک بنی
فاطمہؓ میرے آقاؐ کی ٹھنڈک بنی                           فاطمہؓ کملی والے ؐ کی اجرک بنی

اس کے در کے گدا شاہ بنتے گئے                              اس کے نقشِ قدم راہ بنتے گئے
ذرے مٹی کے تھے ماہ بنتے گئے                            جو بھی اس کے بہی خواہ بنتے گئے

نازشِ زندگی فاطمہؓ فاطمہؓ                                            روشنی روشنی فاطمہؓ فاطمہؓ
نورِ عینِ نبیؐ فاطمہؓ فاطمہؓ                                            اور لباسِ علیؓ فاطمہؓ فاطمہؓ

آیتوں نے سلامی اسے پیش کی                                     قدسیوں نے سلامی اسے پیش کی
مؤمنوں نے سلامی اسے پیش کی                                     نوکروں نے سلامی اسے پیش کی

فاطمہؓ کی جو پوشاک ہے پاک ہے                                  اس کے قدموں کی جو خاک ہے پاک ہے
دخترِ شاہِ لولاکؐ ہے پاک ہے                                   میرا ادراک ہے پاک ہے پاک ہے

وہ جو راحت ہے قلبِ نبیؐ کے لیے                                    وہ جو حرمت ہے حضرت علیؓ کے لیے
وہ جو جنت ہے سید ولیؓ کے لیے                                             سیدی کے لیے مرشدی کے لیے

فاطمہؓ سے مقدس کہانی بنی                                                    فاطمہؓ دونوں عالم کی رانی بنی
فاطمہؓ اس قدر تو سہانی بنی                                           فاطمہؓ مصطفیؐ کی نشانی بنی

ماؤں کا مان ہے، آن ہے، بان ہے                                    پاک تر شان ہے جیسے قرآن ہے
بنتِ لاثانؐ ہے، بوئے ریحان ہے                                            دین و ایمان ہے میرا ایمان ہے

ساری پاکیزگی سیدہؓ کے لیے                                               یہ مری زندگی سیدہؓ کے لیے
وقف ہے شاعری سیدہؓ کے لیے                                           نوکری چاکری سیدہؓ کے لیے

علم و نورِ نبیؐ ورثۂِ فاطمہؓ                                               صاف و شفّاف آئینۂِ فاطمہؓ
=لکھتا پڑھتا رہوں اسوۂِ فاطمہؓ

اور کھاتا رہوں صدقۂِ فاطمہؓ                                   ماں خدیجہؓ کی بیٹی پہ لاکھوں سلام
میرے آقا کی بیٹی پہ لاکھوں سلام                             شاہِ والا کی بیٹی پہ لاکھوں سلام
سب کے مولیٰؐ کی بیٹی پہ لاکھوں سلام