امام انبیا سوہنْا محمد مصطفی آیا

(غیر مطبوعہ سرائیکی نعت)

ابن امیر شریعت مولانا سید عطاء المحسن بخاری رحمۃ اﷲ علیہ

امام انبیاء سوہنْا محمد مصطفی آیا
نبی اُمّی لقب اُمّیاں وچوں بنْ مجتبیٰ آیا

ہیندے سر تے ایہہ تاجِ خاتمیت ڈاھڈا چھکدا ہے
جو اوّل انبیاء دا خود تے آخر مقتدیٰ آیا

اوہ پا کے تاج محبوبی مٹاونْ نفرتاں آیا
بنی آدم ہیں سب بھائی ڈساونْ مصطفی آیا

نبی سوہنڑیں کوں منیا پہلے پہلے بس غریباں نیں
غریباں کوں ایں امت دا بنڑاونْ مھتدیٰ آیا

محمد عبد ہے رب دا محمد مولیٰ ہے سب دا
چھڑاونْ شرک دی لعنت تو سب کوں مصطفی آیا

محمد مصطفی توں پہلے دنیا شرک دا گڑھ ہئی
مٹا سب شرک دا جھگڑا جڈاں سوہنْا مصطفی آیا

محمد مصطفی مکی و مدنی تہامی ہاشمی سرور
اساڈا ظاہر و باطن سجاونْ مصطفی آیا

نگاہِ علم نبوی وچ محمد عبد اعلیٰ ہے
مٹاونْ شرک و خرمستی محمد مصطفی آیا

محمد ظاہر و باطن دے وچ انسان کامل ہے
مٹاونْ ویسیں دا اولہا خدا دا مدعیٰ آیا

مکے وچ مصطفی سئیں نے تیرھاں سال ڈکھ جھلّے
اِلٰہ و عبد انج انج ھِنْ، سکھاونْ مصطفی آیا

تریوی سال احمد سئیں نے احدیّت نکھیڑی ہے
عقیدے سارے شرکیہ ونجاونْ مصطفی آیا

میں نعت مصطفی لکھی میں مدحِ مجتبیٰ لکھی
ہنْ آدھے بندہ بندہ اوہ غلامِ مصطفی آیا

محبت تے عبادت وچ عطاؔ میں فرق کیتا ہے
خدا خود حشر وچ آکھے غلامِ مصطفی آیا