توحید ِ باری تعالیٰ جل جلالہ

(غیر مطبوعہ سرائیکی نظم)

ابن امیر شریعت حضرت مولانا سید عطاء المحسن بخاری رحمۃ اﷲ علیہ

ﷲ خالق رازق مالک محیٖی آپ مُمِیت
جیہڑا اونکوں ایویں مَنّے ہر جا اوندی جیت
ﷲ مومن آپ مھیمن نالے رب غفّار
جیہڑا اوندا بنڑ کے راہوے اوندا اوہ ستّار
عالم غیب تے حاضر دا اوہ خود حسیب مقیت
جیندا ہوں تے تکیہ ہووے پالے اوندی پریت
اِلٰہٌ واحد ذات ہے اوندی صفتاں بے شمار
ڈکھ سکھ دے وچ مومن بھائی ہوں کوں فقط پکار
اِلٰہ دی ذات صفات اندر توں جیکر کچھ رَلاویں
ایہو شرک جلی و خفی ہے نیڑے مُول نہ جاویں
پاک نبی دی شفاعت نال وی مشرکا مول نہ بچ سیں
دوزخ دے وچ سڑدا راہ سیں جنت وچ نہ ویسیں
سارے جرم معاف کریسی اوہ غفور و غافر
شرک دا جرم نہ معاف کریسی سڑسیں ظاہر باہر
نبی ولی تے غوث قطب سب اﷲ دے محتاج
جیہڑا غنی دے در تے ڈھاوے اوہو پاوے تاج
رب دا کم نئیں رُکدا کہیں بن، کہیں دا نہ بنڑدا اوندے باجھ
جیندا عشق ایہہ پختہ ہوے کرے دلیں تے راج
حاجت روا انسان جے ہوندا موت دا جام نہ پیندا
جے تئیں دنیا باقی راہندی او وی راہندا جیندا
موت نشانی عاجز دی تے عجز نشانی عبد دی ہے
جیہڑا جیندے عبد سڈاوے مر کے رب نئیں سڑیندا
وَمَا ارسلنا والی آیت پڑھ کے فرضِ نبوت جان
کل نبیاں دے سرور نے ایہہ قائم رکھیا مان
تریوی سال نبی سرور نے سبق توحید پڑھایا
جنڈی کنڈی قبر پتھر تے اج تیں سیں نوایا
احرار دے مرشد پیر بخاری شرک دی پٹی پاڑ
ہوندے راہ تے ٹردے راہسوں مٹیاں ڈیسوں جھاڑ
اﷲ ساڈی مدد کریسی بر بحر وچ کوہ کپر وچ
ہر مشکل وچ تے ڈکھ بُکھ وچ ہر او جھڑ کالے کلر وچ