نعت

سلیم احمد

طبیعت تھی میری بہت مضمحل
کسی کام میں بھی نہ لگتا تھا دل
بہت مضطرب تھا ، بہت بے حواس
کہ مجھ کو زمانہ نہ آیا تھا راس
مرے دل میں احساسِ غم رَم گیا
غبار آئینے پر بہت جم گیا
مجھے ہو گیا تھا اک آزار سا
میں تھا اپنے اندر سے بیمار سا
یونہی کٹ رہی تھی مری زندگی
کہ اک دن نویدِ شفا مل گئی
مجھے زندگی کا پیام آ گیا
زباں پر محمدﷺ کا نام آ گیا
محمدﷺ قرارِ دلِ بے کساں
کہ نامِ محمدﷺ ہے آرامِ جاں
ریاضِ خدا کا گلِ سر سبد
محمدﷺ ازل ہے محمدﷺ ابد
محمدﷺ کہ حامد بھی محمود بھی
محمدﷺ کہ شاہد بھی مشہود بھی
محمدﷺ کہ باطن بھی ظاہر بھی ہے
محمدﷺ کہ اوّل و آخر بھی ہے
محمدﷺ بشیر و محمدﷺ نذیر
محمدﷺ سراج و محمدﷺ منیر
محمدﷺ خلیل و کریم و حکیم
محمدﷺ عزیز و رؤف و رحیم
محمدﷺ کلیم و محمدﷺ کلام
محمدﷺ پہ لاکھوں درود و سلام