نعت رسول مقبول صلی اﷲ علیہ وسلم

قمر احمد عثمانی رحمہ اﷲ
فخرِ نبوت، فخر رسالت صلی اﷲ علیہ وسلم                                 صاحب دیں و سرتاجِ شریعت صلی اﷲ علیہ وسلم
گنجِ صداقت ، مخزنِ حکمت صلی اﷲ علیہ وسلم                                          کانِ دیانت ، جانِ امانت صلی اﷲ علیہ وسلم
حاملِ قرآں ، محرمِ یزداں ، منبعِ ایماں ، مصدرِ عرفاں                                    جلوۂ وحدت ، مظہرِ قدرت صلی اﷲ علیہ وسلم
ذاتِ مکرم ، خلقِ مجسم ، سرورِ عالم، رہبرِ اعظم                                      لطفِ سراپا ، پیکرِ رحمت صلی اﷲ علیہ وسلم
چہرۂ انور صبحِ درخشاں ، لوحِ جبیں مہتاب فروزاں                                            نورِ نبوتِ ، نورِ ہدایت صلی اﷲ علیہ وسلم
صاحب اَسریٰ ، رہ رُوِ اقصیٰ ، مظہر ثم وَنا فتدلیٰ                                        عرش نشین و ہمدمِ خلوت صلی اﷲ علیہ وسلم
روضۂ اقدس ، قبلۂ عالم ، کوچہ بطحا ، کعبۂ دوراں                                         گنبدِ خضرا ، قصرِ نبوت صلی اﷲ علیہ وسلم
زکرِ مبارک وردِزباں ہو ، پیشِ نظر طیبہ کا سماں ہو                                       دل ہو قمر ، آئینۂ حضرت صلی اﷲ علیہ وسلم
(مطبوعہ:ماہنامہ ’’فیض الاسلام‘‘ راولپنڈی)